काठमाडौं । प्रतिनिधिसभाले ‘नेपाल विशेष सेवा ऐन, २०४२ को साविकको व्यवस्था जगाउनेसम्बन्धी विधेयक, २०८३’ र ‘राष्ट्रिय सेवा दल विधेयक, २०८३’ लाई दफावार छलफलका लागि सम्बन्धित समितिमा पठाउने प्रस्ताव सर्वसम्मतिले स्वीकृत गरेको छ।

प्रतिनिधिसभाको आज बसेको बैठकमा प्रधानमन्त्री वालेन्द्र शाहको तर्फबाट कानुन, न्याय तथा संसदीय मामिलामन्त्री सोविता गौतमले उक्त प्रस्ताव प्रस्तुत गरेकी थिइन्। बैठकले दुवै विधेयकलाई विस्तृत अध्ययन तथा दफावार छलफलका लागि सम्बन्धित समितिमा पठाउने निर्णय गरेको हो।

यसअघि मन्त्री गौतमले प्रधानमन्त्री शाहको तर्फबाट आर्थिक वर्ष २०८१/८२ का न्याय परिषद्, न्याय सेवा आयोग तथा लोकसेवा आयोगको ६६औँ वार्षिक प्रतिवेदन प्रतिनिधिसभामा पेश गरेकी थिइन्।

त्यसैगरी अर्थमन्त्री डा. स्वर्णिम वाग्लेले बैठकमा ‘अर्थसम्बन्धी केही नेपाल कानुनलाई संशोधन र खारेज गर्ने विधेयक, २०८३’ प्रस्तुत गरेका थिए।

प्रतिनिधिसभाको अर्को बैठक असार ३१ गते बिहान ११ बजे बस्ने संघीय संसद् सचिवालयले जनाएको छ।