काठमाडौं। सङ्घीय संसद्अन्तर्गतको संसदीय सुनुवाइ समितिको बैठक आज बिहान ११ बजे सिंहदरबारस्थित संसद् भवनमा बस्दैछ।

राज्य व्यवस्था तथा सुशासन समितिको सभाकक्षमा हुने बैठकमा प्रमुख निर्वाचन आयुक्त र निर्वाचन आयुक्त पदका लागि प्रस्तावित व्यक्तिहरूका सम्बन्धमा प्राप्त उजुरीमाथि छलफल गरिनेछ। साथै, प्रस्तावित उम्मेदवारहरूले पेस गरेको कार्ययोजना पनि समितिका सदस्यलाई वितरण गरिने सम्भावित कार्यसूची रहेको छ।

गत असार १९ गते बसेको संवैधानिक परिषद्को बैठकले प्रमुख निर्वाचन आयुक्त पदमा मानबहादुर कार्कीलाई नियुक्तिका लागि सिफारिस गरेको थियो। त्यस्तै, निर्वाचन आयुक्त पदमा डा। राजीव सुब्बा र गुरुप्रसाद वाग्लेको नाम पनि सिफारिस गरिएको थियो।

संवैधानिक व्यवस्थाअनुसार संसदीय सुनुवाइ समितिबाट प्रस्तावित नाम अनुमोदन भएपछि उनीहरूलाई राष्ट्रपतिबाट नियुक्त गरिनेछ।