राष्ट्रिय स्वतन्त्र पार्टी (रास्वपा) की सांसद ज्वाला संग्रौलाले आफू सांसद भइसक्दा समेत वर्षौंदेखि साइबर अपराधको शिकार हुनुपरेको र न्याय नपाएको भन्दै आक्रोश व्यक्त गरेकी छन् । सोमबार प्रतिनिधि सभाको महिला तथा सामाजिक मामिला समितिको बैठकमा बोल्दै सांसद संग्रौलाले फितलो साइबर सुरक्षा र प्रहरीको कार्यशैलीमाथि प्रश्न उठाएकी हुन् ।

बैठकमा आफ्नो मोबाइलमा एउटा पुरानो स्क्रिनशट देखाउँदै उनले भनिन्, “म एउटा सांसद भइसक्दा समेत न्यायका लागि साइबर ब्युरो धाइरहनु परेको छ । मैले त न्याय पाइनँ भने यो देशका दूरदराजका, पिछडिएका, जसको आवाज छैन, ती महिलाले कसरी न्याय पाउँछिन् होला ? मलाई यो कुराले अत्यन्त चिन्तित बनाएको छ ।”आफू ७-८ वर्षअघि जापानमा विद्यार्थी हुँदा कान्तिपुर दैनिकको मास्टहेड दुरुपयोग गरेर आफ्नो चरित्रहत्या गरिएको घटना स्मरण गर्दै उनले भनिन्, “कान्तिपुरको हेडलाइन दुरुपयोग गरेर मेरो विरुद्ध एउटा फेक समाचार बनाइयो । म नेपाल फर्किएर कान्तिपुरको कार्यालय पुग्दा त्यो समाचार किर्ते पुष्टि भयो । तर, त्यो किर्ते गर्नेलाई कारबाही गराउन म आजसम्म साइबर ब्युरो धाइरहेकी छु ।”

सांसद संग्रौलाले आफूलाई आइतबार मात्रै एक राजनीतिक दलका नेताले इनबक्समा धम्की दिएको समेत दाबी गरिन् । उनले भनिन्, “हिजो मात्रै एउटा ठुलो राजनीतिक दलको नेताले मेरो इनबक्समा आएर ‘तँ जेल जान्छस्, तेरो यात्रा जेलको हो’ भनेर सन्देश पठाउनुभएको छ । मलाई यसो भन्नुको कारण के हो, केही थाहा छैन ।”

नेपाल प्रहरीको साइबर ब्युरोको अनुसन्धान क्षमतामाथि प्रश्न उठाउँदै उनले थपिन्, “मेरो चिनजानकै मान्छेले मेरो चरित्रहत्या गर्यो र फेसबुकमा मेरो फोन नम्बर सार्वजनिक गरिदियो । मैले प्रहरीलाई उसलाई समात्न आग्रह गर्दा ब्युरोले मेटाले डेटा दिएन’ भन्ने रेडिमेड जवाफ दियो । के कुनै महिला आफ्नो चरित्रहत्या भएर मरिसकेपछि मात्रै फेसबुकले डेटा दिने हो ?”

विद्यमान कानुन कार्यान्वयन नभएको र अपराधीको राजनीतिक संरक्षण हुने गरेको भन्दै उनले आक्रोश पोखिन् । “कानुनमा चरित्रहत्या गर्नेलाई एक लाख जरिवाना र पाँच वर्ष कैद भनिएको छ । तर यहाँ व्यवहारमा के हुन्छ भने- कसैले महिलाको चरित्रहत्या गर्छ, दुई दिन हिरासत बस्छ र तेस्रो दिन छाती फुलाएर निस्कन्छ । हिरासत बाहिर उसलाई फूलमाला लगाएर स्वागत गरिन्छ । हामी कस्तो समाजको परिकल्पना गर्दैछौँ ?” उनले प्रश्न गरिन् ।