नागरिकका गुनासा, समस्या तथा सुझावलाई प्रत्यक्ष रूपमा सुन्ने र आवश्यक सहजीकरण गर्ने उद्देश्यका साथ पार्टीले आगामी श्रावण २५ गतेदेखि केन्द्रीय कार्यालय ‘घण्टीघर’ मा ‘हामी सुन्छौँ’ अभियान सञ्चालन गर्ने भएको छ।

अभियानअन्तर्गत नागरिकहरूले आफ्ना समस्या, गुनासा तथा सुझाव प्रत्यक्ष रूपमा पार्टी नेतृत्वसमक्ष राख्न सक्नेछन्। प्राप्त सुझाव तथा गुनासाहरूलाई सम्बन्धित निकायसँग समन्वय गरी आवश्यक सहजीकरण गर्ने व्यवस्था मिलाइनेछ।

अभियानलाई प्रभावकारी र निरन्तर सञ्चालन गर्न प्रत्येक दिन केन्द्रीय सदस्य तथा प्रतिनिधिसभा सदस्यमध्ये दुईजनाको नियमित उपस्थिति रहने व्यवस्था गरिएको छ। साथै, हरेक दिन कम्तीमा एकजना प्रतिनिधिसभा सदस्यको अनिवार्य उपस्थिति सुनिश्चित गरिएको छ।

पार्टीले यस अभियानलाई नागरिकसँग प्रत्यक्ष संवाद, जनगुनासो सुनुवाइ तथा जनउत्तरदायी राजनीतिक अभ्यासलाई थप सुदृढ बनाउने महत्त्वपूर्ण पहलका रूपमा अघि बढाएको जनाएको छ।