काभ्रेपलाञ्चोक । काभ्रेपलाञ्चोकको चौरीदेउराली गाउँपालिका–६ स्थित नयाँ बस्ती खेल मैदानमा ‘नयाँ बस्ती खुला भलिबल प्रतियोगिता–२०८३’ आजदेखि औपचारिक रूपमा सञ्चालनमा आएको छ। नयाँ बस्ती युवा समिति (NBYC) को आयोजनामा सुरु भएको प्रतियोगिता ४ दिनसम्म सञ्चालन हुनेछ।

प्रतियोगिताका लागि आयोजकले सार्वजनिक गरेको खेल तालिकाअनुसार लिग चरण, क्वार्टरफाइनल, सेमिफाइनल हुँदै तेस्रो स्थान र फाइनलका खेल सञ्चालन हुनेछन्। तालिकामा कुल १४ खेल समावेश गरिएका छन्। प्रतियोगितामा विभिन्न टोलीबीच प्रतिस्पर्धा हुनेछ।

प्रतियोगिताको प्रथम पुरस्कार एक लाख रुपैयाँ, द्वितीय पुरस्कार ४० हजार रुपैयाँ र तृतीय पुरस्कार २० हजार रुपैयाँ रहेको छ। आकर्षक पुरस्कार राशिका कारण प्रतियोगितालाई खेलाडी तथा खेलप्रेमीले चासोका साथ हेरेका छन्।

“खेलकुद हाम्रो शान, स्वस्थ युवा हाम्रो अभियान” तथा “एकता, सद्भाव र खेलकुदका लागि” भन्ने मूल नारासहित आयोजना गरिएको प्रतियोगिताको उद्देश्य स्थानीय खेलकुदको विकास, युवाको प्रतिभा पहिचान र खेलाडीलाई प्रतिस्पर्धाको अवसर प्रदान गर्नु हो।

विभिन्न चुनौती र मेहनतका बीच प्रतियोगिता सञ्चालनमा ल्याइएको आयोजकले जनाएको छ। प्रतियोगिताले स्थानीय युवालाई खेलकुदमा सक्रिय बनाउनुका साथै आपसी एकता, सद्भाव र सामाजिक सम्बन्धलाई थप मजबुत बनाउने अपेक्षा गरिएको छ।

नयाँ बस्ती युवा समितिले प्रतियोगिताका आगामी खेलहरूमा उपस्थित भई खेलाडीको हौसला बढाउन सम्पूर्ण खेलप्रेमी दर्शकलाई आग्रह गरेको छ।