संगीतकार टंक बुढाथोकी र बाल गायक अशोक दर्जीबीचको सम्बन्धमा गम्भीर फाटो आएको छ। कुनै समय बाबुछोराजस्तै सम्बन्धमा रहेका उनीहरूबीच अहिले बोलचाल र सम्पर्कसमेत नरहेको टंकले बताएका छन्।

‘झिंगेदाउ २’ को प्रिमियरमा सञ्चारकर्मीसँग कुरा गर्दै टंकले सामाजिक सञ्जालमा आफूलाई अशोकलाई ‘प्रयोग गरेको’ आरोप लगाइँदा दिक्क लागेको बताए।

उनले भने, ‘अशोकलाई गीत गाउन सिकाएँ, अभिनेता बनाएँ, चलचित्र बनाएर हिरो बनाएँ, अब म कसैलाई सहयोग गर्दिनँ।’

टंकले आफू अशोकको अभिभावक नरहेको स्पष्ट पार्दै अब सम्बन्ध भए पनि व्यावसायिक रूपमा मात्र हुने बताए। ‘मन विनाको धन २’ मा अशोक नरहेको पनि उनले पुष्टि गरे।

टंकका दाजु टिका बुढाथोकीका अनुसार अशोकले पढाइ पूरा गरी नेपाली सेनामा जागिर खाओस् भन्ने टंकको चाहना थियो। तर अशोकले संगीत र अभिनयलाई रोजेपछि उनीहरूबीच दूरी बढेको हो।