कोभेन्ट्री, बेलायत — नेपाली सामाजिक अभियन्ता तथा युवाहरूका लागि प्रेरणादायी व्यक्तित्व विप्लव खड्का, बेलायतको प्रतिष्ठित Coventry University बाट ‘Student of the Year 2024–25’ को सम्मान प्राप्त गर्न सफल भएका छन्। विश्वविद्यालयले हरेक वर्ष उत्कृष्ट शैक्षिक प्रदर्शन, अनुशासन, नेतृत्व क्षमता, र सामाजिक योगदानका आधारमा एक जना विद्यार्थीलाई यो पुरस्कार प्रदान गर्दै आएको छ।

विप्लव खड्काले अध्ययनसँगै समाजमा सकारात्मक परिवर्तन ल्याउने उद्देश्यका साथ विश्वविद्यालय भित्र र बाहिर विभिन्न सामाजिक कार्यक्रम, नेतृत्वदायी पहल, र सामुदायिक सेवामा उल्लेखनीय भूमिका निर्वाह गर्दै आएका छन्।

खासगरी अन्तर्राष्ट्रिय विद्यार्थीहरूको हक–हितको वकालत गर्नु, diversity र inclusion को प्रवर्द्धन गर्नु, मानसिक स्वास्थ्यप्रति सचेतना फैलाउनुजस्ता विषयमा खड्काको सक्रियता विश्वविद्यालय प्रशासनद्वारा अत्यन्त प्रशंसनीय मानिएको छ। उनले विभिन्न देशका विद्यार्थीहरूबीच सहकार्य र सद्भाव कायम गर्न खेलेको भूमिकाले सबैलाई प्रेरित गरेको छ।

नेपालमा रहँदा पनि उनी शिक्षा, वातावरण, मानवअधिकार र युवा नेतृत्वका क्षेत्रमा क्रियाशील सामाजिक अभियन्ता थिए। यही निरन्तरता उनले बेलायतमा पनि कायम राख्दै आएका छन्, जसको परिणामस्वरूप उनले अन्तर्राष्ट्रिय स्तरमै यो प्रतिष्ठित पुरस्कार प्राप्त गरेका हुन्।

सम्मान ग्रहणपछि उनले प्रतिक्रिया दिँदै भने,
“यो सम्मान मेरो मात्र होइन, मेरो देश, मेरो समुदाय, र ती सम्पूर्ण युवाहरूको हो, जसले आफ्नो सपनालाई साकार पार्न रातदिन मिहिनेत गरिरहेका छन्। मैले पाएको यो मानलाई अझ सार्थक बनाउँदै, नेपाल र नेपालीको गौरवपूर्ण पहिचानलाई विश्वमञ्चमा उजागर गर्न म सधैं समर्पित रहनेछु।”

विप्लवको यो सफलताले न केवल नेपाल र नेपाली समुदायलाई गर्व गराएको छ, तर विश्वभर रहेका नेपाली विद्यार्थीहरूका लागि प्रेरणाको स्रोत बनेको छ। यो उपलब्धिले देखाएको छ कि अध्ययनसँगै सामाजिक उत्तरदायित्व बहन गर्दै अगाडि बढेमा नेपाली युवाहरूले अन्तर्राष्ट्रिय क्षेत्रमा पनि उल्लेखनीय उपस्थिति जनाउन सक्छन्।